फगुनवाँ गउवाँ में आइल – जगदीश पंथी
चइती फसिल गदराइल, फगुनवाँ गउवाँ में आइल,
धरती पियरकी रंगाइल, फगुनवाँ गउवाँ में आइल।
पेड़वा पुरनकी पतइया गिरावै
नई-नई कलंगी से देहिया सजावै
पछुआ बयरिया रसाइल, फगुनवाँ गउवाँ में आइल।
‘पिउ-पिउ’ पपिहरा कोइलिया के बोली
भउजी के आइल दुअरवा पर डोली
मुनियाँ के सुदिन धराइल, फगुनवाँ गउवाँ में आइल।
चंग-मृदंग धमार खोरी-खोरी
उड़ै अबीर गुलाल चारी ओरी
रंगवा में नेहिया पगाइल, फगुनवाँ गउवाँ में आइल।
अमवाँ बउरइले महुइया मोजराइल
सगरो सिवनवाँ वसंती रंगाइल
रतिया वन्दनिया हेराइल, फगुनवाँ गउवाँ में आइल।
